Hyang Yesus puniki Margi Nuju Sang Hyang Aji
14
Raris Hyang Yesus ngandika sapuniki,
“Eda ja ragane makejang ngelah keneh sengsaya.
Pracaya ja kapining Sang Hyang Pengardi,
tur pracaya ja pada kapining Tiang.
2 Ring purin Ajin Tiange di swarga liu ada tongos ngoyong.
Yening tusing saja buka keto,
Tiang tusing ja ngorahin unduk Tiange luas kemu bakal nyadyayang tongos buat ragane makejang.
3 Disubane Tiang luas nyadyayang tongos buat ragane,
Tiang bakal malipetan ngalih ragane,
apanga dija ja Tiang ngoyong,
ragane makejang masih bareng ada ditu.
4 Lan ragane nawang jalane,
kijake Tiang luas.”
5 Raris I Tomas matur ring Hyang Yesus sapuniki,
“Ratu,
titiang sami nenten uning kijake Iratu luas.
Punapike titiang sami prasida uning margine mrika?”
6 Raris Hyang Yesus nyaurin sapuniki,
“Tiang ene jalan nuju Sang Hyang Aji,
krana Tiang ene Sang Sane Patut tur sumber idup manusane.
Tusing ja ada anake ane nyidayang neked sid Sang Hyang Aji yening tusing malantaran Tiang.
7 Yening ragane makejang nawang Tiang,
pastika ragane masih nawang Sang Hyang Aji.
Uli jani ragane suba nawang Ida,
lan suba ningalin Ida.”
8 Raris I Pilipus matur ring Hyang Yesus sapuniki,
“Ratu,
dadosang ja mangda titiang sami prasida nyingakin Sang Hyang Aji.
Nika manten sane tunas titiang.”
9 Raris Hyang Yesus nyaurin sapuniki,
“Wih Pilipus,
suba mekelo Tiang bareng-bareng ajak ragane makejang,
nanging ragane tonden masih nawang Tiang.
Anake ane suba ningalin Tiang,
artine ia suba ningalin Sang Hyang Aji.
Ngudake ragane ngraos buka kene,
‘Dadosang ja mangda titiang sami prasida nyingakin Sang Hyang Aji?’
10 Wih Pilipus!
Tusingke ragane pracaya,
Tiang masikian sareng Sang Hyang Aji,
lan Sang Hyang Aji masikian sareng Tiang?
Apa ja ane pidartayang Tiang teken ragane makejang,
tusing ja maasal uling ragan Tiange.
Nanging Ajin Tiange setata masikian sareng Tiang.
Ida nglaksanayang paindikane sane laksanayang Tiang puniki.
11 Pracaya ja kapining Tiang,
indik Tiang masikian sareng Sang Hyang Aji lan Sang Hyang Aji masikian sareng Tiang.
Yening ragane tusing pracaya pengandikan Tiange ene,
lamen keto pracaya ja tekening paundukan ngangobin ane laksanayang Tiang.
12 Tiang ngandikayang ane patut,
sujatine nyen ja ane pracaya kapining Tiang,
ia bakal nglaksanayang pakaryan buka pakaryan ane laksanayang Tiang.
Buina,
anake ento bakal nglaksanayang pakaryan ane gedenan kapining Tiang,
krana Tiang luas mrika ring Sang Hyang Aji.
13 Turmaning,
apa ja ane tunas ragane,
krana ragane gelah Tiange,
Tiang jagi ngicen.
Buka keto Sang Hyang Aji kaagungang olih Sang Putra.
14 Yening ragane mapinunas kapining Tiang krana ragane gelah Tiange,
pinunas ragane jagi icenin Tiang.”
Hyang Yesus Majanji Ngutus Roh Penulung
15 “Yening ragane makejang tresna asih teken Tiang,
ragane bakal nuutin saluirin prentah Tiange.
16 Tiang bakal nunas kapining Sang Hyang Aji mangda Ida ngicen Penulung sane lianan buat nyarengin ragane salamin-laminne.
17 Penulunge punika nenten tios Roh Sang Hyang Pengardi sane ngedengang apa ane patut buat ragane.
Anake ane mabesikan ajak gumine ene tusing ja nyidang nerima Ida krana tusing nepukin tur tusing nawang Ida.
Nanging ragane nawang Ida,
krana Ida nyarengin ragane tur jagi masikian ajak ragane.
18 “Tiang tusing ja bakal ngalain ragane buka anak ubuh.
Tiang bakal mawali buin sid ragane.
19 Buin akejep anake ane mabesikan ajak gumine ene tusing bakal ningalin Tiang buin,
sakewala ragane bakal ningalin Tiang.
Krana Tiang maurip,
ragane masih bakal maurip.
20 Duk ragane ningalin tiang buin,
ragane bakal nawang yening Tiang masikian sareng Sang Hyang Aji,
lan ragane masikian ajak Tiang,
keto masih Tiang masikian ajak ragane.
21 Nyen ja ane nerima tur nuutin prentah Tiange,
ia ane tresna kapining Tiang.
Ajin Tiange bakal tresna teken anake ane tresna teken Tiang.
Keto masih,
Tiang bakal tresna tur ngedengang anggan Tiange sane sujati teken anake ento.”
22 Raris I Yudas sane lianan,
nenten ja Yudas Iskariot,
mataken kapining Hyang Yesus sapuniki,
“Ratu,
napi mawinan Iratu kayun ngedengang anggan Iratune sane sujati kapining tiang sami,
nanging nenten kapining anake ring jagate puniki?”
23 Irika raris Hyang Yesus masaur sapuniki,
“Nyen ja ane tresna teken Tiang pastika bakal nuutin pengajahan Tiange.
Ajin Tiange bakal tresna teken anake ento.
Sang Hyang Aji lan Tiang jagi rauh tur meneng sid anake ento.
24 Nyen ja ane tusing tresna teken Tiang,
ia tusing nuutin pengajahan Tiange.
Pengajahan ane dingehang ragane ento,
tusing ja uli Tiang,
nanging saking Sang Hyang Aji ane ngutus Tiang.
25 “Saluirin unduke ento suba nikayang Tiang tatkala Tiang nu bareng-bareng ajak ragane.
26 Nanging Roh Penulung,
inggih punika Roh sane Suci,
jagi kautus olih Sang Hyang Aji apanga ngantinin Tiang.
Rohe punika jagi ngajahin ragane saluirin paundukan,
tur jagi ngingetin ragane unduk makejang ane suba ajahin Tiang tekening ragane.
27 “Tiang ninggal dame sid ragane;
damene ento ane icen Tiang tekening ragane.
Caran Tiange ngicen dame malenan teken caran gumine ene.
Eda ja ragane ngelah keneh sengsaya tur jejeh.
28 Ragane suba ningehang pengandikan Tiange buka kene,
‘Tiang bakal luas,
sakewala Tiang bakal mawali sid ragane.’
Yening ragane tresna teken Tiang,
sapatutne ragane masukarena krana Tiang luas ring Sang Hyang Aji.
Ida sane agungan tekening Tiang.
29 Tiang ngorahang paundukane ento teken ragane satonden unduke ento mamargi,
apanga ragane dadi pracaya tatkala unduke ento mamargi.
30 Tiang tusing ja bakal liu buin ngandika tekening ragane krana suba galahne I Jaat ane nguasain gumine teka.
Sujatine ia tusing nyidang nguasain Tiang,
31 sakewala Tiang nglaksanayang makejang prentah Sang Hyang Aji.
Tatujone apanga anake di gumine ene nawang unduk Tiang tresna kapining Ida.
“Ane jani,
lan ja iraga luas uli dini.”